१८ जेठ/अर्थ र व्यापार – नेपाल एशोसियशन अफ टुर एण्ड ट्राभल एजेन्ट्स (नाट्टा)ले सरकारले आगामी आर्थिक वर्ष २०८०/८१ को लागि सार्वजनिक गरेको बजेट मार्फत हवाई टिकटमा लगाइएको मुल्यअभिबृद्धिकर (भ्याट) फिर्ता गर्न माग गरेको छ ।
यसैगरि, नाट्टाले वैदेशिक भ्रमणको प्याकेज विक्री गर्दा ५ प्रतिशत वैदेशिक पर्यटन शुल्क लगाउने व्यवस्था गरिएको प्रति गम्भीर ध्यानाकर्षण भएको जनाएको छ ।
नाट्टाका अध्यक्ष रमेश थापाले बिहीबार विज्ञप्ती जारी गर्दै सरकारसँग यस्तो माग गरेका हुन । गत १५ जेठमा सरकारले सार्वजनिक गरेको बजेटमा विदेश भ्रमण गर्दा लाग्ने शुल्क र हवाई टिकटमा लगाइएको भ्याट फिर्ता गर्न माग गरेका छन् ।
‘विदेश जानका लागि सरकारले लिँदै आएको हवाई टिकटमा १३ प्रतिशत अतिरिक्त भ्याट लिने व्यवस्था बजेटमा गरिएको छ, नेपालबाट टिकट काट्दा भ्याट तिनुपर्ने र विदेशबाट टिकट काट्दा भ्याट तिर्नु नपर्ने व्यवस्थाले नेपाली टुर तथा ट्राभल कम्पनी मारमा पर्ने देखिन्छ’ अध्यक्ष थापाले विज्ञप्तिमा भनेका छन ।

सोही विज्ञप्ति मार्फत नाट्टाले कोरोना महामारीपछि विस्तारै तंग्रिदै गरेको नेपालको पर्यटन व्यवसायमा साविककै आन्तरिक तथा अन्तर्राष्ट्रिय भाडादर महंगो भईरहेको अवस्थामा अहिले यसरी भ्याट थप्दा भाडादर झनै महंगो पर्ने र यात्रुले खरीद गर्न नसक्ने अवस्था देखिएको जनाएको छ ।
बजेट मार्फत सरकारले गरेको यस्तो कार्यले देसको पर्यटन व्यवसाय र सम्बन्धित सरोकारवाला निकायसँगको छलफल र समन्वयबिना ल्याइएका नीति, नियमले उपभोक्ता, पर्यटन व्यवसायी र समग्र पर्यटन क्षेत्रलाई नै प्रतिकुल असर पर्ने नाट्टाले जनाएको छ ।

यसैगरि, नाट्टाले बजेट मार्फत सरकारले सुविधा सम्पन्न तथा तारे होटलमा दुई प्रतिशत विलासिता कर लगाउने व्यवस्था गर्नु पनि गलत भएको बताएको छ । त्यसैगरि, नाट्टाले सन् २०२३ देखि २०३२ लाई पर्यटन भ्रमण दशकका रुपमा मनाउने निर्णय बजेटमार्फत गरिनु सकारात्मक पक्ष भएको जनाएको छ ।
निजगढ विमानस्थल निर्माण गर्ने, अन्य विमानस्थलको स्तरोन्नती गर्ने, सांस्कृतिक सम्पदाको पुनःनिर्माण गर्ने, नयाँ गन्तव्यस्थलको पहिचान र पूर्वाधार विकास गरिनु सकारात्मक भएको नाट्टाले जनाएको छ ।

गत आर्थिक वर्षको तुलानामा आव २०८०/८१ का लागि पर्यटन क्षेत्रमा दुई अर्ब ५० करोड रुपैयाँ भन्दा बढी बजेट थप गरिनु नेपालको समग्र पर्यटन उद्योगीका लागि खुसीको विषय भएको नाट्टाले आफ्नो धारणामा भनेको छ ।
सरकारले अहिले पनि विभिन्न शिर्षकहरु राखि हवाई टिकटमा कर उठाईरहेको सर्वविदितै छ । यसका साथै नयाँ बजेट मार्फत लागु गर्न खोजिएको आउटबोन टुरको ५ प्रतिशत तथा हवाई टिकटमा लगाइने भनिएको १३ प्रतिशत भ्याट के कसरि र कुन आधारमा लिइने हो ? त्यसको स्पष्ट व्ययस्था समेत नभकाले यो नियम कार्यान्वयनको पक्ष एकदमै जटिल रहेको भन्दै नाट्टाले अहिले ल्याईएको भ्याट र करसम्बन्धी व्यवस्थालाई कार्यान्वयन नगर्न र हालकै व्यवस्थालाई निरन्तरता दिन सरकारसँग आग्रह गरेको छ ।