१६ मंसिर/अर्थ र व्यापार– खाद्य प्रविधि तथा गुण नियन्त्रण विभागले खाद्य ऐन उल्लङ्घन गर्ने उद्योगमा सबैभन्दा बढी प्रशोधित पिउने पानीका उद्योग रहेको जनाएको छ । 

विभागले साउनदेखि कात्तिकसम्मको पहिलो चौमासिकमा खाद्यसम्बन्धीका १ हजार १८९ नमूना संकलन गरिएकामा त्यसमध्ये सबैभन्दा बढी प्रशोधित पिउने पानीका २१ उद्योगले मापदण्डानुसार सञ्चालन नगरेको भेटिएको हो ।

पिउने पानीका उद्योगपछि दानाका १६, तेल तथा घ्यूजन्य नमूना १४, खाद्यान्न १० लगायतका अन्य खाद्य पदार्थका उद्योगहरु रहेका छन् । 
खाद्य प्रविधि तथा गुण नियन्त्रण विभागका प्रवक्ता मोहनकृष्ण महर्जनले पहिलो चौमासिकमा खाद्यसम्बन्धीका १ हजार १८९ नमूना संकलन गरिएकामा ७० नमूना मापदण्डानुसार नभएको पाइएको बताए।

महर्जनले खाद्य ऐन उल्लङ्घन गर्ने २१ पानी उद्योगलसहित मापदण्डानुसार सञ्चालन नभएका व्यवसायलाई कानूनी कारबाही गरिएको जानकारी दिए ।    

यस्तै खाद्य स्वच्छता सर्भिलेन्सका लागि ८७६ ओटा नमूना संकलन गरिएकोमा न्यूनस्तर तथा दूषित उत्पादन तथा विक्री वितरण गरेको कसूरमा खानेतेल, बेकरी, दाना, चाउचाउ, मिठाइ, घ्यू, दही, चामल, सस, काजु किसमिस, खाद्य रङ, बियर, मटरफ्राइजस्ता खाद्य पदार्थ उत्पादन गर्ने उद्योग २६ ओटा उद्योगविरुद्ध मुद्दा चलाइएको छ । त्यसमध्ये पनि सबैभन्दा बढी पिउनेपानीका पाँच उद्योग परेका छन् ।

उक्त मुद्दामध्ये आठ ओटा मुद्दा न्यून गुणस्तरका, सात ओटामुद्दा दूषितका, सात ओटा मुद्दा लेबललगायतका विवरण नमिलेका तथा बाँकी चार ओटा मुद्दा खाद्य ऐन नियम निर्देशिका उल्लङ्घनसम्बन्धी छन् ।       

पहिलो चौमासिकमा मुलुकभर खाद्य र दाना उद्योग, होटल रेष्टुरेण्ट, राजमार्गका होटललगायत १ हजार ८७३ पटक निरीक्षण अनुगमन भएको छ । उक्त अवसरमा १५३ ओटा उजुरी कारवाही गरिएको छ ।

ति मध्ये, खाद्य ऐन, २०२३, खाद्य नियमावली, २०२७ तथा निर्देशिकाबमोजिम उत्पादन नगर्ने ३४ ओटा उद्योग एवं खाद्य व्यवसायलाई उत्पादन रोक्का एवं सिलबन्दीका साथै नमूना सङ्कलन गरी कारवाही अघि बढाइएको छ ।

विभिन्न १२ ओटा नाकामा रहेका खाद्य आयात निर्यात गुणस्तर प्रमाणीकरण कार्यालयमा २५ हजार १५४ ओटा नमूना प्राप्त भई सोको जाँच विश्लेषण गरी नियमन गरिएको बताइएको छ । 

त्यसमध्ये पापड, चामल, बदाम, मसला, मैदा, वेसनलगायतका २५ ओटा नमूना प्रतिकूल पाइएपछि आयात रोक्का गरिएको विभागले जानकारी दिएको छ ।