२६ कात्तिक/अर्थ र व्यापार– वैधानिक रुपमा श्रम स्वीकृति भएका नेपाली नागरिकहरूलाई भारतको विमानस्थल हुँदै श्रम गन्तव्य मुलुक जानका लागि अब नो अब्जेक्सन सर्टिफिकेट (एनओसी) नचाँहिने व्यवस्था लागु गरिएको छ ।
दिल्लीस्थित नेपाली राजदूतावासले सूचना जारी गर्दै साउदी अरब, कतार, कुवेत, संयुक्त अरब इमिरेट्स, ओमान, बहराइन, इराक, लिबिया र लेबनान जाँदा यस दूतावासबाट एनओसी लिनुपर्ने तर वैदेशिक श्रम स्वीकृति लिएका नेपाली नागरिकहरूलाई भने एनओसी आवश्यक नरहेको जनाएको छ ।
यसैगरी, नेपाली कूटनीतिक÷आधिकारिक÷सेवा राहदानी धारकहरू, संयुक्त राष्ट्र संघ लायसेज–पासर (यूएनएलपी) भएका नेपाली नागरिकहरू र १६ वर्ष मुनिका नेपाली नाबालिगहरूलाई पनि एनओसी आवश्यक नपर्ने दुतावासले जनाएको छ ।
त्यसैगरी, अमेरिका, बेलायत तथा सेनजेन मुलुकको भिसा भएका नेपाली नागरिकहरूलाई पनि एनओसी चाँहिने छैन । रुस सरकारबाट छात्रवृत्ति प्राप्त गर्ने र व्यावसायिक भिसा हुनेहरू बाहेक रसिया जाने यात्रुहरूले भने दूतावास वा नेपालको कन्सुलर सेवा विभागबाट एनओसी प्राप्त गर्नुपर्नेछ ।
ट्राभल एनओसी आवश्यक पर्ने नेपाली नागरिकलाई इमेलमार्फत दूतावासको वेबसाइटमा उल्लेख गरिएका सबै आवश्यक कागजातहरू सहित तोकिएको मितिभन्दा कम्तिमा सात दिन अगाडि सम्पर्क गर्न दुतावासले अनुरोध गरेको छ । यात्रा एनओसी को लागि सेवा शुल्क प्रति व्यक्ति १ हजार भारतीय रुपैयाँ तोकिएको छ ।
यसले अब सहजै नेपाली कामदार भारतीय विमानस्थलबाट तेस्रो श्रम गन्तव्य मुलुक जान पाउने छन् । यो व्यवस्था कार्यान्वयनमा आएपछि श्रम स्वीकृति भएका नेपाली नागरिकले भारतीय विमानस्थल प्रयोग गरेर तेस्रो गन्तव्य मुलुक जान पाउने सरकारले स्पष्ट बताएको छ ।
भारतको नयाँदिल्ली स्थित नेपाली राजदूतावासले सोमबार सूचना निकालेर श्रम स्वीकृति भएका नेपाली नागरिकले अब भारतीय विमानस्थल प्रयोग गरेर श्रम गन्तव्य मुलुक जान एनओसी नचाँहिने बताएको हो ।
हाल काठमाडौको त्रिभुवन अन्तर्राष्ट्रिय विमानस्थलमा ट्याक्सी वे विस्तारले गर्दा अन्तर्राष्ट्रिय उडान ३० प्रतिशत कटौतीमा परेको कारण देखाएर वायुसेवा प्रदायक कम्पनीहरूले भाडा पाँच गुणासम्म बढाएपछि वैदेशिक रोजगार व्यवसायीहरूले भारतीय विमानस्थल प्रयोग गरेर जान पाउने व्यवस्था गर्न गत २३ कात्तिकमा सरकारको ध्यानाकर्षण गराएका थिए ।
वैदेशिक रोजगार व्यवसायी संघका अध्यक्ष राजेन्द्र भण्डारीको नेतृत्वमा गरेको व्यवसायीको प्रतिनिधीमण्डलले परराष्ट्रमन्त्री आरजु राणा देउवा, श्रम, रोजगार तथा सामाजिक सुरक्षामन्त्री शरतसिंह भण्डारी, संस्कृति, पर्यटन तथा नागरिक उड्डयनमन्त्री बद्रिप्रसाद पाण्डेलाई सामुहिक रुपमा भेटेर त्रिभुन अन्तर्राष्ट्रिय विमानस्थलको उडान कटौतीले चर्को हवाई भाडा तिर्न बाध्य नेपाली कामदारलाई राहन दिन भारतीय विमानस्थल प्रयोग गरेर वैदेशिक रोजगारीमा जान पाउने व्यवस्था गर्न जोडदार माग गरेका थिए ।