२१ साउन/अर्थ र व्यापार – बैंकहरूले गत आर्थिक वर्षको चौथो त्रैमासिक वित्तीय विवरण सार्वजनिक गरेका छन् । विवरणअनुसार सबै वाणिज्य बैंकहरूको औसत खुद नाफा एक वर्षको अवधिमा १३.४० प्रतिशत बढेको छ ।
सञ्चालनमा रहेका २० वाणिज्य बैंकहरूले गत आर्थिक वर्षमा ६४ अर्ब १६ करोड रुपैयाँ खुद नाफा कमाएका छन् । अघिल्लो आर्थिक वर्षमा यस्तो नाफा ५६ अर्ब ५८ करोड रुपैयाँ थियो ।
गत आर्थिक वर्षमा नबिल बैंकले सबैभन्दा धेरै ७ अर्ब ६ करोड रुपैयाँ नाफा कमाएको छ भने माछापुच्छ्रे बैंकको नाफा सबैभन्दा कम १ अर्ब २५ करोड रुपैयाँ छ । समिक्षा अवधीमा १० वटा बैंकको नाफा बढेको देखिन्छ भने १० वटाको घटेको छ ।
समिक्षा अवधीमा मर्ज तथा एक्वीजिसनका कारण केही बैंकको नाफा बढेको देखिए पनि वास्तविकतामा घटेको छ । प्रभु बैंकको नाफा वृद्धिदर सबैभन्दा उच्च छ । सो बैंकको नाफा एक वर्षकै अवधिमा १६ गुणा बढेको छ । एनआईसी एसिया बैंकको नाफा भने सबैभन्दा धेरै ६८.९ प्रतिशत घटेको छ ।
बैंकहरुको नाफा उच्च देखिए पनि वितरणयोग्य नाफा न्युन छ । पाकिसकेको साँवा, ब्याज रकम पनि समयमै उठ्न नसक्दा कतिपय बैंकको वितरणयोग्य नाफा नै ऋणात्मक छ । २० बैंकको औसत वितरणयोग्य नाफा १८ अर्ब ५८ करोड रुपैयाँ छ ।
गत आर्थिक वर्षमा हिमालयन, कुमारी र एनआईसी एसिया बैंकको वितरणयोग्य नाफा ऋणात्मक छ । त्यस्तै हिमालयन, कुमारी, एनआईसी एसिया र नेपाल इन्भेस्टमेन्ट मेगा बैंक सञ्चित नोक्सानीमा छन् ।

तथ्यांकमा बैंकको नाफा नोक्सान

बैंक   २०८०/८१ (नाफा रु हजारमा)     २०७९/८० (नाफा रु हजारमा)        फरक

नबिल      ७०६००३३                       ६४०४९३६                                  १०.२३

हिमालयन    २८३८०४९                   १५६२८१७                                 ८१.६० 

सानिमा    २३८१९४१                      २६०५७९३                               -८.५९

एनआइएमबि   ५१९८३२०                  ३७२०८३३                             ३९.७१

एनएमबि   २३३४५९९                    ३२२२५४७                             -२७.५५

एनआइसी एसिया  १३८१८६९             ४४४४७६९                          -६८.९१

लक्ष्मी सनराइज  ३०३४५३९              २२८५२३९                            ३२.७९

प्राइम    ३७७४३०२                      १०२७८९९                           २६७.१९

प्रभु     ४४८०८१०                      २८०२१९                               १४९९.०४

नेपाल   १६५६८३१                      ३४३७५७८                           -५१.८०

स्टान्डर्ड चार्टर्ड   ३३०८९५४               ३४६५३३०                         -४.५१

सिटिजन्स  १३४२४६६                    १८६३७५६                        -२७.९७

ग्लाेबल आइएमई  ६०१६२१६            ६६९४३५८                      - १०.१३

सिद्धार्थ     ३०१५५३५                      ३१६६७७१                      -४.७८

माछापुच्छे     १२५०१६७                    १६२५५२५                     -२३.०९

कुमारी      २३०८२१२                       ५१७९२१                      ३४५.६७

राष्ट्रिय वाणिज्य      ३३९८२१२                ३५९५१२७                  -५.४८

एभरेष्ट         ३७००६४८                      ३३६२११५                     १०.०७

नेपाल एसबिआई      २०१३७२१            १९६७५०८                   २.३५

कृषि विकास         ३६५५६६२              १३२३४११                    १७६.२३

जम्मा            ६४१५१०८६                ५६५७४४५२                  १३.३९