१३ माघ /अर्थ र व्यापार - सामान आयात गर्दा समय र ढुवानी खर्च धेरै लागेको अवस्थामा तेस्रो मूलुकबाट सामान आयात गर्न सहज होस् भन्ने उद्देश्यका साथ फागुनको पहिलो सातादेखि इसीटीएस ( इलोक्ट्रोनिक कार्गो ट्रयाकिङ सिष्टम ) लागु गरिने भएको छ । इसीटीएस अर्थात् यसलाई अनलाईन क्लियरिङ सिष्टम समेत भनिएको छ ।

ईसीटीएस लागु गरेपछि यसले धेरै राहत हुने नेपाल उद्योग वाणिज्य महासंघले जनाएको छ । इसीटीएस लागु भए पछि कोलकताबाट वीरगञ्जसम्म ढुवानीमा ४ देखि ५ दिनसम्म मात्र लाग्ने महासंघको भनाई छ । बन्दरगाहमा सामान आएपछि पहिला ८ प्रकारका कागजात पेश गर्नु पर्ने र करिब दुई दर्जन टेबलमा हस्ताक्षर(सिफारिस) गर्दै जानुपर्ने झन्झट रहेको थियो भने इसीटीएस लागु भएपनि भने उक्त झन्झटहरुबाट मुक्त हुने देखिन्छ । यसअघि ६० प्रतिशत सामान रेल र ४० प्रतिशत सामान सडक हुदैं आउने गरेको यो प्रणाली लागु भएपछि भने सडकमा नभई कोलकताबाट वीरगञ्जसम्म रेल देखि रेल सम्म सामान आउने छ ।

रेलबाट सामान आउने र सडकबाट प्रयोग गर्न नपर्दा प्रत्येक कन्टेनरबाट ८ लाख रुपैयाँ जोगिन पुग्दा अरबौं रकम बचत हुने महासंघका कार्यकारणी सदस्य प्रकाश सिंह कार्कीले बताए । इसीटीएस प्रणाली लागु भएपछि सामान आयातमा कम खर्च लाग्दा उपभोक्ता समेत लाभान्वित हुने बताइएको छ । सामान आयातमा कम खर्च लागे सँगै बजारमा सामानको मूल्यमा समेत कमी आउने महासंघले जनाएको छ ।

इसीटीएसले गर्दा सामान आयात तथा निर्यातमा छिटो छरितो हुनुको इसीटीएसकै कारण सामान आयात गर्दा आयातकर्ताको प्रत्येक कन्टनेरमा ४० हजारका दरले लागत घटने छ । उक्त प्रणाली लागु भएपछि आयातकर्ताहरु पुस्तकमा दर्ता गराउनु पर्ने विवरणबाट मुक्त हुनेछन् । उक्त प्रणालीले आयातमा मात्र सहज नभई निर्यातमा समेत सहज हुने बताँउदै कार्कीले भने इसीटीएस लागु भएसँगै निर्यात समेत बढ्ने छ । उनले सामान आयात गर्दा युरोपबाट कलकत्ता सम्म ल्याँउदा १ हजार डलर लाग्ने र काठमाडौंबाट कलकत्ता सम्म सामान निर्यात गर्दा १३ सय डलर लाग्नेमा यो प्रणाली लागु गरेपछि निर्यातकर्तालाई सहज हुने बताए ।

उक्त प्रणालीले आयात र निर्यात सम्बन्धी खर्चहरु पारदर्शिरुपमा राख्नको लागि सहयोग पुग्ने बताइएको छ । इसीटीएस प्रणाली लागु गर्न नेपाल र भारतको सम्वन्धित निकायहरु बीच छलफल गरी कार्यान्वयनमा जान लागेको हो । यो प्रणाली दुई देशबीचको सरकारको सहमति मार्फत् नै लागु गर्न लागिएको महासंघले जनाएको छ ।