२० भदौ / अर्थ र व्यापार – भारत सीमावर्ती ठोरीबाट चीन सीमाको रसुवागढी जोड्ने ‘चेपाङ मार्ग’को स्तरोन्नतीका लागि एसियाली विकास बैंक (एडीबी)ले लगानी गर्ने भएको छ । उक्त मार्गको ट्रयाक खुलिसकेको छ । स्तरोन्नतीका लागि विस्तृत परियोजना प्रतिवेदन (डीपीआर) निर्माणका लागि परामर्शदाता नियुक्तिको प्रक्रिया अगाडि बढेको छ ।

उक्त मार्गको दूरी अहिले ६१ किलोमिटर छ । १० किमि घटाएर फराकिलो बनाउन केही स्थानमा ट्रयाक परिवर्तन र केहीमा सुरूङ निर्माणको तयारी छ । सन् २०१९ देखि उक्त मार्गको स्तरोन्नती सुरु हुनेछ । दुई लेनको सडक तयार पार्ने योजना छ । ठोरी–रसुवागढी सडकको एक अंश हो, चेपाङ मार्ग । ठोरी–रसुवागढीको दूरी एक सय ६८ किमि छ । त्यसमध्ये ६१ किमि खण्ड चेपाङ मार्गमा पर्छ ।

धादिङको मलेखुबाट चितवनको भण्डारासम्मको खण्डलाई चेपाङ मार्ग नामकरण गरिएको छ । अहिले मलेखुबाट मुग्लिन हुँदै नारायणगढसम्मको दूरी एक सय पाँच किमि छ । त्रिशुली नदीमाथिको भीर छिचोलेर सडक निर्माण गरिएका कारण जोखिम पनि उत्तिकै छ । चेपाङ मार्ग बनेपछि भण्डाराबाट मलेखु पुग्न ४४ किमि छोटो पर्नेछ । 

उक्त सडक नारायणगढ–मुग्लिन खण्डको विकल्पका रुपमा पनि प्रयोग गर्न सकिने छ । छोटो दूरीका कारण समय र इन्धनसमेत बचत हुने छ । १५ करोड लागतमा १५ किमि कालोपत्रे गर्न धादिङको मलेखुबाट काम सुरु भएको छ । चालु आर्थिक वर्षमा कालोपत्रे सकिने छ । उक्त सडक सञ्चालनमा आएपछि नारायणगढ–मुग्लिन खण्डको सवारी चाप घट्ने छ ।
अल्पसंख्यक र विपन्न चेपाङ समुदाय।को जीवनस्तर माथि उठाउने उद्देश्यका साथ ।चेपाङ मार्गको ट्रयाक खोलिएको हो ।